មនុស្សប្រុសមិនសូវចេះខឹងច្រើនឡើយ ដោយតែងមានចិត្តអត់ធន់ជាងមនុស្សស្រី តែនៅពេលដែលគេពិបាកចិត្ត ឬខឹងអ្នកមិនគួរបណ្ដោយឲ្យគេនៅតែឯងនោះដែរ ព្រោះអ្នកណាក៏ដោយ នៅពេលដែលមានអារម្មណ៍ខឹងតែងចង់មានអ្នកលួងហើយ។ ខាងក្រោមនេះគឺជាសកម្មភាពអ្នកគួរធ្វើនៅពេលគេងរង៉ក់នឹងយើង។
១. ចេះរក្សាភាពស្ងៀមស្ងាត់ត្រូវពេលវេលា
ត្រូវចេះស្ងាត់នៅពេលគេស្ងាត់ដែរ នេះគឺការជៀសវាងភាពតានតឹងរបស់អ្នកទាំង២ នៅពេលដែលជម្លោះបានកើតឡើងហើយ។ នៅពេលប្រកែកគ្នា ហើយគេដើរចេញទាំងស្ងៀមស្ងាត់មានន័យថា កំហឹងឡើងដល់កំពូលហើយ ដូចនេះបើយើងនៅតែតមាត់ទៀត រឿងអាចបែកធំជាងមុនទៀត។
២. ហ៊ាននិយាយពាក្យសូមទោសមុន
មនុស្សស្រីភាគច្រើនតែងអះអាងថាខ្លួនត្រូវជានិច្ចរាល់ពេលប្រកែកគ្នា ទាំងដែលខ្លួនជាអ្នកខុសក៏ដោយ។ រឿងបែបនេះកើតឡើងច្រើនដងនឹងធ្វើឲ្យគេធុញទ្រាន់។ ដូចនេះពាក្យសូមទោសមួយម៉ាត់គឺមិនពិបាកពេកទេ ប្រសិនបើយើងពិតជាស្រលាញ់គេមែន។
៣. សូមទុកពេលឲ្យគេ
ប្រសិនបើនិយាយពាក្យសូមទោសហើយ តែគេនៅតែងរ កុំទាន់អាលស្រែកឆោឡោអី។ មនុស្សប្រុសមិនទុករឿងក្នុងចិត្តយូរនោះទេ ប្រសិនបើគេដឹងថាយើងទទួលកំហុសហើយ គេនឹងឆាប់បាត់ខឹងមិនខាន។
៤. ឱបពីខាងក្រោយ
នៅពេលពាក្យសំដីគេលែងចង់ស្ដាប់ហើយ មានតែប្រើសកម្មភាព។ ទោះបីជាខឹងខ្លាំងយ៉ាងណាក៏ដោយ ប្រសិនបើអ្នកឱបគេពីខាងក្រោយឱ្យជាប់នោះ គ្មានមនុស្សប្រុសណាដាច់ចិត្តខឹងសង្សារខ្លួនដល់ថ្នាក់នេះហើយមិនព្រមលើកលែងនោះឡើយ។
៥. ឥទ្ធិពលនៃទឹកភ្នែក
ការយំគឺជាអាវុធដ៏សាហាវបំផុតរបស់មនុស្សស្រី។ កម្រនឹងរកបានបុរសណាដែលអាចទ្រាំបាននឹងទឹកភ្នែកមនុស្សស្រីខ្លាំងណាស់។ នៅពេលដែលលួងអស់ចិត្តអស់ចង់ហើយ តែគេនៅតែមិនព្រមបាត់ងរ ត្រូវតែយកក្បាច់ចុងក្រោយនេះមកប្រើ ធានាថានឹងទទួលបានផល។
៦. កុំរំលឹករឿងនាំឲ្យខឹងគ្នាឡើងវិញ
ក្រោយពេលជានាគ្នាហើយ ដាច់ខាតកុំរំលឹករឿងនាំគេខឹងឡើងវិញឲ្យសោះ កុំឲ្យដូចពាក្យគេនិយាយថា ដំបៅមិនឈឺមិនយកឈើរុក។ អ្វីដែលកន្លងផុតហើយ កុំលើកឡើងមកនិយាយទៀត។ ពេលខ្លះដោយសារតែចង់ឌឺឬលេងសើចជាមួយគេ ក៏យកមកនិយាយទៀត នេះមិនមែនជារឿងដែលគួរធ្វើនោះទេ៕
